Ang Iyong Kwento

image of coffee and chat, borrowed from t1.gstatic.com

Kwentuhan tayo/ storytelling.uk.net

Ang iyong kwento – nakakatuwa, nakakalungkot, nakakapagpasaya, nakaka-engganyo. Samahan mo ako, balikan natin ang iyong kwento…

 

Ang iyong kwento – tungkol sa ligaw na pusang iyong inalagaan, tungkol sa alaga mong isang araw ay namatay, tungkol sa itinago mong lungkot na sa akin mo napiling ihayag, tungkol sa panahong unti-unti mong natanggap – may mga bagay na nawawala at lumilipas.

Ang iyong kwento – tungkol sa unang araw mo sa klase, tungkol sa nabigo mong musmos na pag-ibig, tungkol sa isang hapong napagalitan ka ng iyong nanay, tungkol sa araw na tuluyang umalis sa inyo – ang iyong tatay.

 

image of a signboard about storytelling, borrowed from t0.gstatic.com

Kwento ay ukol sa nakalipas/ linvilleray.blogspot.com

Ang iyong kwento –  tungkol sa kinaiinisan mong guro, tungkol sa iyong pagsusumikap na matutuhan ang leksyon sa eskwela, tungkol sa iyong karibal sa karangalan, tungkol sa mga hamon at paano ang mga iyon – iyong napagtagumpayan.

Ang iyong kwento – tungkol sa away ninyong magkapatid, tungkol sa paano mo natuklasan ang kahulugan ng inggit, tungkol sa sinabi sa iyong kailangan mong magtipid, tungkol sa pangarap mong umasenso,  abutin ang langit.

 

Ang iyong kwento – tungkol sa pag-alis mo sa inyong lugar, tungkol sa pangangailangang sa ibang tao’y makibagay, tungkol sa pagkakalayo mo sa iyong nanay, tungkol sa pananabik mo sa pagkaing lutong-bahay.

Ang iyong kwento – tungkol sa nag-iba mong buhay, tungkol sa bago mong kaibigan at mga kasabay, tungkol sa panibagong hirap at pananamlay, tungkol sa iyong pagsusumikap – makalangoy at makaagapay.

 

Ang iyong kwento –  tungkol sa pagkabigo, tungkol sa unang beses na naisip mong sumuko, tungkol sa tadhanang sa iyo ay nagbiro, tungkol sa iyong malalim na pagsuyo, tungkol sa karanasan mong seryosong manibugho.

Ang iyong kwento – tungkol sa pagbabalik mo sa pagsusulat, tungkol sa pagtatangka mong diskubrehin uli ang art, tungkol sa iyong pagkahumaling at pagpupuyat, tungkol sa pagsisingit mong makapagkwento, habang kamo ika’y may hinahanap.

 

Ang iyong kwento – tungkol sa pagkahilig mo sa musika at paanong wika mo’y nagbabago ang mga kanta, tungkol sa bandang sinalihan mo noong ika’y bata-bata pa, tungkol sa pag-awit at mga bagay na akala mo dati, nalimutan mo na.

Ang iyong kwento – tungkol sa mga kaibigang nakatagpo sa iyo at iyo ring natagpuan, tungkol sa paano nila pinasasaya ang iyong mga araw, tungkol sa paano sila nakikialam sa iyong buhay, tungkol sa mga kalokohan, pagbabahagi at pagdamay.

 

Ang iyong kwento – tungkol sa pulitika ng bansa at paanong kung minsan, naiisip mong parang wala nang magagawa, tungkol sa pagnanais mong magkaroon ng pagbabago, umunlad ang kalakalan, magkaroon ng lugar para sa mga OFW.

Ang iyong kwento – tungkol sa showbiz at kamo’y mga kababawan ng Pinoy, tungkol sa mga artistang sa iyo ay uminis, tungkol sa mga ewang balitang para lang tsismis, tungkol sa mga kaganapang pampalipas ng oras – habang ika’y naiinip.

Ang iyong kwento – tungkol sa kalikasan, kung paano ka nagmuni-muni sa ilalim ng buwan, tungkol sa paano mo sinamba ang ganda ng araw, paano kang nahalina sa samyo ng hangin at pagkakasalansan ng mga ulap, tungkol sa paano mo tinawid ang makapangyarihang dagat.

 

image of children chatting under the moon's light

Mainam ang kwentuhan pag maliwanag ang kalangitan/ aecunity.net

 

Ang iyong kwento – tungkol sa mga agam-agam, tungkol sa panahong mga mata mo sa luha’y nahilam, tungkol sa papaano paniniwala mo’y ipinaglaban, tungkol sa iyong pagkatalo at paghahagilap ng dahilan – upang muling makabangon, harapin muli ang lipunan.

Ang iyong kwento, tungkol sa mga bagay na naglalaho, tungkol sa hinaharap na tila lumalabo, tungkol sa kasalukuyang tila nais kang igupo, tungkol sa iyong pagkalito at kagustuhang gawin na lang ay umupo, tungkol sa balak mong umalpas – para pangarap muling mabuo.

Ang iyong kwento – tungkol sa pag-asa, paano mo ito pinanghawakan at paanong minsa’y iniiwan ka, tungkol sa panata mong maging matibay at matatag, tungkol sa pangako mong pagkakamali’y ituwid – daa’y gawing patag.

 

image of a reminder in storytelling, borrowed from t3.gstatic.com

Kwento mo, kwento ko, kwento nating lahat / communityorganizer20.com

Ang iyong kwento – karamihan pa ay natatandaan ko. Kahit sabihin pang ibinahagi mo sila ng pira-piraso. Sumasagi sa isip ko – ang kislap ng iyong mata habang pinagtatagni-tagni – ang iyong mga istorya. Habang umaasa kang may uunawang nilalang – dito sa kabilang dulo.

 

Iingatan ko ang iyong mga kwento. Kahit alam kong hindi lahat, sinabi mo. Kahit batid kong karanasan ng tao,  di pare-pareho. Lahat tayo ay may pinipilit maabot, naglalakbay dito – sa mundong alam natin – buhay, di piho.

 

Ikinalulugod kong ikaw ay narito. Ikinararangal kong sa akin ikaw ay nagkukwento. Aabangan ko –  ang susunod na ibabahagi mo.😉

 

 

Possibly Related Post:

Bahay-bahayan, luma at bago

 

31 responses to this post.

  1. Naisip ko lang: Ang buhay ng tao ay pinagtagni-tagning kwento.

    Tugon

    • nice thought, singkamas🙂 parang na-imagine ko, ang buhay ay mukhang quilt, haha. btw, napanood mo movie, the american quilt?🙂

      Tugon

      • Wow ang galing! Magkapareho po tayo ng naiimagine kasi quilt talaga ang naiimagine ko nung naisip ko yun.

        Hindi ko pa po napapanood yun. *sabay konting research sa Google* Winona Ryder. Hmmm. *downloads the movie*😀

      • oh, sige. tell me what you think about the movie after mong mapanood.😀

        gusto kong magkaroon ng quilt, yong maraming-maraming designs at maganda ang combination ng mga kulay. maski quilt man lang, maganda dahil ang quilt ng buhay ko, ewan, haha!

        hope you are well this season of singkamas, singkamas. thanks sa laging pagdaan…🙂

  2. naalala ko raw ang pagsusulat ko ng diary na hindi ko na halos magawa. i write in diary, blogs, planner, organizer at kahit sa cork board. iisa lang naman halos ang nilalaman pero magkakaiba ang atake at side story.

    sa lahat sa diary nandoon ang lahat. madetalye, makwento, emosyonal at totoong-totoo. pero once na balikan ko na ulit ang mga isinulat ko alaala na lang wala na talagang emosyon. hehehe.

    makwento lang.

    Tugon

    • hello, hoshi. at masipag ka pala talagang mag-reflect-reflect at mag-notes? hehe… aba, malay mo, balang araw, ikaw ay maging scriptwriter o makagawa ng something creative, say?

      when i was in my 20s, medyo may ganyan din akong attempts. na-drop ko ang habit no’ng medyo dumadami na ang trabaho at active pa sa gimmicks, haha!

      alam mo, iba nga ata ang mood habang sinusulat pa lang ang pyesa at pag binabasa na lang… may mga nasulat na nga akong parang nagdududa ako kung ako nga ba ang nagsulat, haha. parang di ko gaanong ma-recognize?!🙂

      Tugon

  3. wow! isa ito sa mga paborito ko sa mga naisulat mo ate san, parang personal kang nakikipag-usap sa bawat bumabasa at sa mga taong binabasa mo ang blog.. nakakatuwa, nakuha mo na halos lahat ng bahagi ng pagkukwento.🙂

    gusto kung isipin na sana para sa kin ang post na to…hahaha

    Tugon

    • salamat, anini. malaking thank you.😀

      sa ‘yo iyang post, ahaha. naisip kita lalo na noong parteng may tungkol sa dagat. ilang beses kong inisip kung ano ang verb na gagamitin ko para ro’n. sa huli, nag-settle ako sa word na ‘tinawid.’

      hmm… marami pang di ko na-cover. baka masyado nang humaba…🙂

      Tugon

  4. iniisip ko kung sino ako sa mga tinukoy mo, kung anu anong mga kwento ang naibahagi ko…pero alam kong mas marami tayong pinagkwentuhan hindi dito mismo kundi sa sulatroniko. =)

    Tugon

  5. “Iingatan ko ang iyong mga kwento. Kahit alam kong hindi lahat, sinabi mo” — pinakagusto ko tong linyang to.🙂

    Tugon

  6. salamat sa pagdaan at pagbabasa, tapa. thanks for appreciating the thought.😀

    may paliwanag ako or defense dyan. isa sa sabi sa book about blogging, ang main currency raw sa blogging ay honesty. e, literal akong tao, to the letter ang naging kuha ko, haha.

    ang mga una kong sinulat, OA sa honesty. sa title pa lang e.g., Pag-iigib ng Tubig, Maglalako, Usong Yari ng Bahay, mga ganyan… later ko pa na-gets na kailangan pala, maiksi lang at dapat catchy ang title (not necessarily give-away) at may subtlety para medyo kilitiin ang audience. hayon…

    dahil nga siguro sa virtual nature ng blogging, necessarily, di sasabihin ng blogger lahat about him/her. and necessarily, to some extent, magiging malandi si blogger sa kanyang audience. may mga subtexts sa posts na left for the reader to imagine, kumbaga…

    hindi ako mahabang magpaliwanag, hi, hi…🙂

    Tugon

  7. may kwento ako sayo don sa bahay ko…

    anong gusto mong meryenda? ipaghahanda kita hehehehe

    “Iingatan ko ang iyong mga kwento. Kahit alam kong hindi lahat, sinabi mo.”

    Tugon

    • hello, sphere… sige, punta ako roon sa inyo.🙂

      ang gusto kong meryenda – palabok at ice cream (coffee crumble). haha, di ata magkaterno… :s

      basta, paparo’n ako.😀

      Tugon

  8. it gets better and better. nauna ko kasing nabasa yung tungkol sa bukas. this one makes me realize some things tungkol sa mga kwentong ginagawa ko. parang kahit anu lang but still, tingin ko, isa pa rin siyang kwentong dapat mahayag.

    ang totoo, lahat naman talaga ay may kwento. nagiging walang kwenta ang kwento kadalasan dahil minsan, nag e-expect tayo sa nagku kwento. thats why sa kahit anung kwento, mas pinipili kong mag concentrate sa mismong kwento kesa sa taga kwento. minsan, parang laging kulang, minsan, taliwas sa inaasahan natin ang daloy, pero yun na yun eh. maging masaya na lang tayo dahil lakas loob talaga ang pagbabahagi ng isang kwento.

    Tugon

    • hindi kahit ano lang, duking. iyong iba mong kwento, naitulak akong gawan ng another kwento o kaya, tula. minsan, tini-twist o tini-tweak ko ng konti ang plot or structure. minsan, kinokontra o ini-stretch ko, haha…. siguro, di lang naman ako ang naa-apektuhan ng posts mo, am sure may iba pa…

      alam mo, meron talagang mahusay magkwento, e. merong maparaan magsabi ng istorya. meron din namang kwentong ang ganda kahit may mali-mali sa grammar o may kulang-kulang. ako, gusto ko may variety ang mga kwentong nababasa ko.

      itong post na ito ay parang sagot sa post ng isang ka-blog…

      salamat sa pagdalaw at sa pag-appreciate, duking.🙂

      Tugon

  9. […] Sino o ano kaya ang nagpapasaya sa kanya ngayon? Bakit kaya matagal siyang nawala? Ano kaya ang baon niyang kwento sa kanyang […]

    Tugon

  10. […] Page ng sari-saring bloggers – bakit sila naitulak o nangahas sa blogging at paano… Ang Iyong Kwento naman,  isang pag-e-enumerate sa mga istoryang nakakaantig – galing sa posts ng […]

    Tugon

  11. Reblogged this on doon po sa amin and commented:

    Hello, ka-blogs… Reblog muna tayo uli, pasensya na… Isa ito sa marami-raming blogs about blogging na naisulat at nailathala rito sa DPSA. May kalumaan na, pero sana ay maibigan ninyo kahit konti. Happy weekend.🙂

    Tugon

  12. ang bawat kwento natin, ibat iba. may kanya kanyang husay at sustansiya at higit sa lahat.. ito ay imortal😉 kawai kawai….

    Tugon

  13. Uy San! Ang ganda naman nito! Sampung palakpak para dito o! Buti ni-reblogged mo uli to. Ang gaan basahin para sa isang stressful Monday. Tamang-tama sa lunchbreak at humihigop ng mainit na kape habang wala pang ala una.

    Tugon

Mag-iwan ng Tugon

Fill in your details below or click an icon to log in:

WordPress.com Logo

You are commenting using your WordPress.com account. Log Out / Palitan )

Twitter picture

You are commenting using your Twitter account. Log Out / Palitan )

Facebook photo

You are commenting using your Facebook account. Log Out / Palitan )

Google+ photo

You are commenting using your Google+ account. Log Out / Palitan )

Connecting to %s

%d bloggers like this: