Bahay-bahayan, luma at bago

image of a colorful play house

May bahay-bahayan tayo, noong malilliit pa/ t1.gstatic.com

Di ba noong maliliit pa tayo, meron tayong bahay-bahayan? Iyong iba siguro, taguang sulok o sariling pwesto ang tawag… Maaring nasa loob ito ng bahay o nasa labas. Maaring nasa ilalim ng hagdan o nasa isang tabi sa silong. Maaaring ito’y may pinto talaga at maari ring tinabingan lang ng lumang kurtina. Maaring may palamuti sa loob, maari ring wala – payak lang, espasyo lang talaga… Pero mukha itong bahay. At itinuring mo itong iyong bahay.

 

Iyon ‘yon. Ang lugar kung saan di ka lang naglalaro at nanggagaya sa tunay na buhay, kundi doon ka rin naghahakot at nagtatago ng kung anu-ano. Mga anik-anik lang – gutay-gutay nang manika na pinipilit mo pa ring paupuin nang tuwid; lumang keychain ng ate mo na ibinigay sa ‘yo pero di mo magamit dahil wala ka pa namang wallet na mapagsasabitan; magandang batong napulot mo na lagi mong pinupunasan at inaantay na isang araw ay may magsabing may dala itong hiwaga o kaya ay maaari mong ipagbili. Mga ganoon…

 

Iyon din ang lugar kung saan mo dinadala ang mga taong iyong kabati – kapatid, kalaro, kaibigan, mga kaklaseng dumayo sa inyo – mga taong mababait sa ‘yo at di ka kinokontra. Dadalhin mo sila sa iyong sulok at doon kayo magkukwentuhan, magpapakitaan ng bagong laruan, magpapayabangan sa bagong alam na laro, magbubulungan ng tsismis at kung minsan – uupo lang… May mga pagkakataong, maghihilera kayo roon ng mga tansan o, kartong papel o  kaya naman, magtutuhog ng mga bagay na bilog na kanyo – sago, o kaya,  rosaryo.

 

larawan ng malaking bahay-bahayn sa labas ng bahay

Maraming pwedeng gawin sa lugar na ito/ thelovedhomeblog.com

Minsan doon na rin kayo kakain, aabutan kayo ro’n ng meryanda ng iyong nanay o ate. O kaya naman, lalabas kayong magkakalaro para kumuha ng meryenda tapos, babalik kayo agad sa kweba para roon manginain. Para tuloy kayong mga ibon o mga kulisap o mga dagang tumatalilis pabalik sa teritoryo… Hanggang maaari, bawal sa iyong bahay ang matatanda at pati ang mga batang di mo kasundo sa oras na iyon. Sumisilip man sila sa lugar mo kung minsan, iyon ay pag wala ka at di mo alam. At kahit walang nakasulat na OFF LIMITS, alam ng mga tao sa inyo – pribadong espasyo mo ang iyong bahay-bahayan.

 

Doon ka pumupunta noon pag nakakagalitan at ayaw mong magpakitang ika’y umiiyak o nakasimangot. Doon ka nagpapalipas ng sama ng loob sa mga araw na maraming umaaway sa iyo o hindi ibinibigay ang mga gusto mo. Doon ka humihiga pag maraming tao sa bahay nyo at hindi ka ginaganahang makihalubilo. Sa lugar na ‘yon, sa iyong My Own Private Idaho doon ka maraming iginuhit – gamit ang mga pinilas na pahina sa lumang kwaderno ng kuya mo – mga larawan mo at iyong pamilya, kasama pati ang inyong aso.

 

Ang dami rin ng mga sandaling pinalipas mo roon sa iyong sagradong sulok. Minsan ay para itago ang mga ngiti mong abot-tenga pag sa di-inaasaha’y napuri ka. Minsan ay pumupunta ka roon para paliitin ang iyong sariling tila lomolobo – sa dami ng nararamdamang di kayang ipaliwanag. Minsan ay nanonood ka lang doon ng paglalakad ng mga langgam. O, di kaya ay pinaplano ang mga gagawin mo – pag dumating ang araw na malaki ka na at pakikinggan na ng mga tao ang iyong sasabihin.

 

image of a sample domain, borrowed from t1.gstatic.com

Bahay rin ang tawag ng mga tao sa blogsite/ t1.gstatic.com

Bahay rin ang tawag ng karamihan ngayon sa blog site. Pag nag-aanyaya ang isang blogger sa kakilala nya, sinasabi niyang ‘daan ka minsan sa aking bahay.’ May kaugnayan kaya ang bahay-bahayan noong araw, sa pagkakaroon ng online na bahay sa ngayon? Naiisip ko lang.

 

Pero kung seryosong gusto mo itong sagutin o may nais kang ibahagi,  maski hindi ito makakapagpataas sa GNP ng bansa o magko-contribute sa world peace, welcome kang isulat sa espasyo sa ibaba.😀


Ngayon ka lang nakarating dito sa aking bahay? Ay sya, pasok ka. Upo, upo…😉

 

Possibly related posts:

 

Ba’t Mo Naman Napagdiskitahang Mag-blog?

Ang Bagong Betamax – Rated PG

 

17 responses to this post.

  1. madalas ko din yan banggitin pag napopost ko ng comment sa ibang blogger na kaibigan.. “daan ka minsan sa bahay”..noong una, nakikigaya lang ako, at natatanong sa sarili bakit bahay ang tawag dito? .. hindi nagtagal, naunawaan ko din..

    palagi po akong napasok dito ng hindi nyo alam, mabuti at open sa lahat ang bahay natin… maraming salamat po sa pagpapatuloy..

    maganda ang iyong gamit dito (bunga ng malikhaing kaisipan).🙂

    Tugon

  2. hello, banjo.

    salamat sa mga magagandang nasabi mo.😀 balik ako isang araw sa bahay mo, ha?… ‘kaw, welcome ka dito lagi…

    Tugon

  3. paupo ah, sana bati tayo! hehehe

    mabuhay sa’yong bahay-bahayan!

    Tugon

  4. ako naman, munting kagubatan ang tawag ko sa blogsite ko.. syempre mundo ng isang alitaptap ang kagubatan.. pwede narin sigurong ihantulad ito sa bahay-bahayan, taguan ng mga simpleng pangarap, mga pakiramdam na hindi mo kayang sabihin sa iba at minsan naman, labasan ng kung anu-anong anik-anik.

    Tugon

  5. haha… naaaliw nga akong magtakbu-takbo sa ‘yong munting kagubatan, ani… may mga puno, mga kulisap, mga hayop at fairies and peter pan doon, hihi…

    hanap ko mga baging, doon sa kagubatang bahay-bahayan mo – di ko pa nakikita. maglalambitin, over the bangin at maghahanap ng deer – doe, a deer, a female deer…😀

    Tugon

    • hindi lang si peter pan ang nandun..meron din kapitan hook! mga pulitikong gusto kong maging balete para katakutan.. pati linta at alimatik di ko na yata pinalampas.. sinama ko talaga sila sa munting kagubatan ko..hahahaha

      Tugon

  6. ha, ha… kaya masaya😀

    Tugon

  7. Hardin ang tawag ko sa blog ko pero hindi hardin-hardinan ang laro ko nung maliit pa ‘ko. haha! may masabi lang.

    I-email po pala kita mamaya🙂

    Tugon

  8. hello, jec.

    salamat sa pagdalaw sa ‘king bahay-bahayan.😀

    sige, aantayin ko ang email mo. good day. :]

    Tugon

  9. ang ganda naman ng bahay mo…..

    Tugon

  10. hello, prinsepe.

    salamat sa muling pagdalaw. oo, bagong pinta ‘tong bahay-bahayan ko, hi, hi…😀 gravatar na lang ang kulang. :s

    Tugon

  11. […] Bahay-bahayan, luma at bago LikeBe the first to like this post. […]

    Tugon

  12. […] Bahay-bahayan, luma at bago […]

    Tugon

  13. […] Bahay-bahayan, luma at bago […]

    Tugon

  14. […] Bahay-bahayan, luma at bago LikeBe the first to like this post. […]

    Tugon

  15. […] sa isip ko ang paggawa ng blogroll. Una na, para isang click lang ng mouse, andoon na ako agad sa bloghay nyong mga kapatid at katoto. Pangalawa, para maipaalam ko rin naman sa sangkatauhan, este, sa […]

    Tugon

Mag-iwan ng Tugon

Fill in your details below or click an icon to log in:

WordPress.com Logo

You are commenting using your WordPress.com account. Log Out / Palitan )

Twitter picture

You are commenting using your Twitter account. Log Out / Palitan )

Facebook photo

You are commenting using your Facebook account. Log Out / Palitan )

Google+ photo

You are commenting using your Google+ account. Log Out / Palitan )

Connecting to %s

%d bloggers like this: